Luke 5

Ukubizwa Kwabafundi Bokuqala

1Ngelinye ilanga uJesu emi eduze kweChibi laseGenezaretha, abantu beminyezelana kuye belalela ilizwi likaNkulunkulu, 2wabona ekhunjini lwechibi izikepe ezimbili zitshiywe khonapho ngabagoli benhlanzi ababegezisa amambule abo.

3Wangena kwesinye isikepe esasingesikaSimoni, wamcela ukuthi akathi gudlu asuke kancane okhunjini. Wasehlala phansi wafundisa abantu ehlezi esikepeni.

4Eseqedile ukukhuluma wathi kuSimoni, “Gwedla ungene emanzini atshonayo ucwilise amambule akho ukuze ubambe inhlanzi.”

5USimoni waphendula wathi, “Nkosi, sisebenze gadalala ubusuku bonke kodwa kasibambanga lutho. Kodwa njengoba usitsho njalo sengizawehlisa amambule.”

6Kwathi sebenze njalo babamba izinhlanzi ezaba zinengi kwaze kwaqalisa ukudabuka amambule. 7Base bebiza abakhula babo kwesinye isikepe ukuthi bazobelekelela. Beza abakhula babo kwesinye isikepe ukuthi bazobelekelela. Beza bazigcwalisa zombili izikepe zathi phamu zaze zaqalisa ukutshona.

8Kwathi uSimoni Phethro ekubona lokhu wazilahla phansi phambi kukaJesu wathi, “Suka kimi, Nkosi; ngingumuntu oyisoni!” 9Ngokuba yena labakhula bakhe babemangele ngezinhlanzi ababezibambile, 10kwamangalisa njalo uJakhobe loJohane, amadodana kaZebedi, ababe phathisana loSimoni. UJesu wasesithi kuSimoni, “Ungesabi; kusukela manje usuzagola abantu.” 11Base bedonsela izikepe zabo okhunjini batshiya konke bamlandela.

Indoda Eyayilobulephero

12Kwathi uJesu ekwelinye lamadolobho kweza indoda eyayigcwele ubulephero. Yathi ibona uJesu yathi mbo phansi ngobuso yamncenga yathi, “Nkosi, uma uthanda ungangihlambulula.”

13UJesu welula isandla sakhe wayithinta indoda leyo. Wathi, “Ngiyathanda. Hlambuluka!” Masinyane nje ubulephero bahle baphela.

14UJesu waseyilaya wathi, “Ungatsheli muntu, kodwa hamba uyozitshengisa kumphristi ubusunikela umhlatshelo owayalwa nguMosi owokuhlanjululwa kwakho, ukuze kube yibufakazi kubo.”

15Kodwa udumo lwakhe lwanda ngamandla, yikho amaxuku abantu eza ukuza muzwa lokusiliswa emikhuhlaneni yabo. 16Kodwa kanengi uJesu wayesithi nyelele ayosithela ezindaweni ezithuleyo ayokhuleka.

UJesu Usilisa Umuntu Owome Umhlubulo

17Ngelinye ilanga elokhu efundisa, kwakuhlezi khonapho abaFarisi labafundisi bomthetho ababephuma emizini yonke yaseGalile abanye bevela eJudiya laseJerusalema. Amandla eNkosi ayekhona kuye ukuze asilise abagulayo. 18Kwafika amanye amadoda ethwele owome umhlubulo ngecansi bezama ukungena laye endlini bambeke phambi kukaJesu. 19Bathi sebehlulekile ngenxa yokuminyana kwabantu bakhwela ephahleni bamehlisela phansi ngesikhala bamuthi qithi phakathi kwabantu phambi kukaJesu.

20Kwathi uJesu ebona ukholo lwabo wathi, “Mzalwane, izono zakho sezithethelelwe.”

21AbaFarisi labafundisi bomthetho bakhonona bathi, “Ungubani yena lo umuntu okhuluma inhlamba na? Ngubani ongathethelela izono ngaphandle kukaNkulunkulu kuphela na?”

22UJesu wayekwazi abakucabangayo wasebuza wathi, “Kungani linakana izinto ezinje ezinhliziyweni zenu na?

23Yikuphi okulula: ukuthi, ‘Izono zakho sezithethelelwe,’ loba ukuthi, ‘Sukuma uhambe’?

24Kodwa ukuze lazi ukuthi iNdodana yoMuntu ilamandla emhlabeni awokuthethelela izono … ” Wasesithi koyisilima, “Ngiyakutshela ngithi sukuma uthathe icansi lakho uye ekhaya.”

25Masinyane wathi lothu phambi kwabo, wabutha ayekade elele phezu kwakho waya ekhaya edumisa uNkulunkulu. 26Wonke umuntu wamangala, badumisa uNkulunkulu. Baba lesithuli bathi, “Lamuhla sesibone izimanga.”

Ukubizwa KukaLevi

27Ngemuva kwalokhu uJesu waphuma wasebona umthelisi owayethiwa nguLevi ehlezi exhokovaneni lakhe lokuthelisa. UJesu wathi kuye, “Ngilandela,” 28uLevi wasukuma, watshiya konke wamlandela.

29ULevi wasesenzela uJesu idili elikhulu endlini yakhe, kukhona ixuku labathelisi labanye besidla labo.

30Kodwa abaFarisi labafundisi bomthetho abeqembu labo basola kubafundi bakhe bathi, “Lenzelani ukudla linathe labathelisi kanye lezoni na?”

31UJesu wabaphendula wathi, “Kakusibo abaphilayo abaswela umelaphi, kodwa ngabagulayo.

32Kangilandanga ukubiza abulungileyo, kodwa ukubiza izoni ukuba ziphenduke.

UJesu Ubuzwa Ngokuzila

33Bathi kuye, “Abafundi bakaJohane bayazila kanengi bekhuleka, njalo labafundi babaFarisi labo benze njalo, kodwa abakho bahlala besidla, benatha.”

34UJesu waphendula wathi, “Kungenzeka yini ukuzilisa ukudla abamenyiweyo emthimbeni umyeni esahlezi labo na? 35Kodwa sizafika isikhathi lapho umyeni ezasuswa kubo; ngalezo izinsuku bazazila ukudla.”

36Wabatshela umzekeliso lo: “Kakho odabula isichibi esigqokweni esitsha asithungele esigqokweni esidala. Angenzenjalo, uzakuba esesidabule isigqoko esitsha, ikanti isichibi sesitsha kasiyikufanela esidala. 37Njalo kakwenziwa ukuthela iwayini elitsha emigodleni yezikhumba emidala. Umuntu angenzenjalo iwayini elitsha lizaziqhekeza izikhumba iwayini livuze kuthi lemigodla yezikhumba leyo ihle yonakale. 38Hatshi, iwayini elitsha lithelwa emigodleni yezikhumba emitsha. 39Njalo kakho othi eseqale wanatha iwayini elidala alifune elitsha, ngoba uthi, “Elidala lingcono.”